HELEB – Yekîtiya Jinên Ciwan şaxê bajarê Helebê bi meşeke meşeleyan hêrsa xwe li hemberî “Pergala Îmraliyê” nîşan dan.
Pêngava ciwanan li her çar aliyên Kurdistanê li hemberî pergala Îmraliyê û şermzarkirina tecrîda girankirî ya li ser Rêberê Gelê Kurd Abdullah Ocalan didome. Di vê çarçevê de duh li bajarê Helebê Yekîtiya Jinên Ciwan meşeke bi meşeleyan bi rêxistin kir.
Bi dehan ciwan ji taxa Şêxmeqsûd û taxên rojhilatê Helebê tevlî meşê bûn. Meş ji destpêka Navenda Yekîtiya Ciwanên Rojava a taxa Şêxmeqsûd destpê kir. Ciwanan wêneyên Rêberê Gelê Kurd Abdullah Ocalan, alên YJC/YCR’ê û meşele hildabûn.
Dirûşmeyên banga azadiya Ocalan dikin ji aliyê ciwanan ve li kolanên Şêxmeqsûd hatin berzkirin.
Ciwan li Qada Şehîdan a rojavayê taxa Şêxmeqsûd sekinîn û daxuyanî dan. Daxuyanî ji aliyê endama YJC`ê Gulşan Alî ve hat xwendin. Di daxuyaniyê de hat gotin ku heyanî agahî ji Rêberê Gelê Kurd Abdullah Ocalan were girtin ew ê çalakiyên xwe berdewam bikin.
(np)
ANHA
